تاند:( دوشنبه، د دلوې لسمه) د افغانستان د سولې لپاره د امریکا د بهرنیو چارو وزارت ځانګړي استازي ټام وېسټ پاکستان، جرمني او سویس ته د افغانستان په اړه د خپلو شپږ ورځنيو سفرونو د پيل خبر ورکړی دی.
نوموړي نن سهار ویلي، چې دغه سفر د جنورۍ پر ۲۹ پیل شوی او د فبرورۍ تر څلورمې به دوام ولري.
وېسټ په يو لړ ټویټونو کې: «غواړو له شریکانو، افغانانو او بشردوستانه سازمانونو سره د هغو سختو ننګونو په اړه، چې له افغانانو د ملاتړ په برخه کې ورسره مخ یو مشوره وکړو.»
هغه ویلي، چې تمه لري په دې سفر کې حیاتي مرستو او بنسټیزو حقونو ته د افغان نجونو او ښځو د لاسرسي لپاره یوه لار برابره شي.
دا په داسې حال کې ده، چې د طالبانو له خوا په غیردولتي موسسو کې د ښځو پر کار کولو له بندیز وروسته افغانستان ته د نړیوالې ټولنې بشردوستانه مرستې له سختو ننګونو سره مخ شوې دي.
له دې سره پاکستاني رسنيو ويلي، چې د امريکايي استازي سفر لومړی دغه هېواد ته پلان شوی.
معلومه نه ده، چې نوموړی به د پاکستان ملکي که سياسي چارواکو يا د افغانستان پر حاکمې ډلې د اغېز لرونکو پاکستاني مدرسو مشرانو سره وويني.
څه موده مخکې د پاکستان د حقانيه مدرسې مشر مولانا حامد الحق ویلي وو، چې د افغانستان حاکمې ډلې د دوی د په رسميت پېژندلو او ځينو نورو امتيازاتو لپاره د نجونو زده کړې منع کړي، چې دوی يې بيرته پرانيستلو ته هڅوي.