تاند:( یکشنبه، د دلوې دویمه)‏ د ملگرو ملتونو د سرمنشي یوه ویاند فرهان حق د ښځو د حقونو په اړه د افغانستان د حاکم رژیم د چارواکو د دوه ډلې کیدو خبر ورکړی.

نوموړي اسوشیتد پريس خبري اژانس ته ويلي، چې د طالبانو ځینې مشران په افغان نجونو او ښځو محدودیتونه غواړي خو ځینې نور یې بیا په ښکاره توگه د محدودیتونو د رفع کولو پلوي کوي.

سرچینې په دې اړه نور جزییات نه دي ورکړي.

تاند ته د طالبانو ځینو سرچینو ویلي، چې په کندهار کې د طالبانو اميرالمؤمنين ملا هبت الله اخندزاده او ورته نېږدې يو شمېر وزيران او د هغه خپل مشاورين د طالبانو د پریکړو په اصلي مرجع او د افراطي پریکړو په ترسره کوونکو بدل شوي.

سرچینه زیاتوي، چې د طالبانو د قطر ډلې تر څنګ چې د دوی د رييس الوزرا اقتصادي مرستيال ملا عبدالغني برادر ېې مشري کوي، د طالبانو دفاع وزیر ملا یعقوب او د کورنیو چارو وزیر سراج الدین حقاني او د دوی پلویان ټول د نجونو او ښځو د زده کړو او کار مخالف نه دي.

د پخواني ولسي جرګې مرستيال نذير احمدزی باور لري، چې په دې اړه د طالبانو خپلمنځي اختلافات به ژر برسېره او د دوی تر منځ د پراخو ناندريو سبب شي.

د احمدزي په باور، طالبان تر ډېره د لوی کندهار او لوی پکتیا په ډلو وېشل شوي او د لوی پکتیا طالبان چې مشري ېې د طالبانو د کورنیو چارو وزیر سراج الدین حقاني او حقاني شبکه کوي، د ښځو د حقونو په ګډون د نورو افراطي پریکړو پر وړاندې په ښکاره ښايي ودريږي.

د سراج الدين حقاني نیږدې کس او مخکینی وياند قاري سعید خوستی بيا وايي، چې سراج الدين حقاني د طالبانو ځينو پریکړو سره د نظر له اختلاف سره بیا هم د طالبانو د مشرتابه د « اطاعت » حکم ته غاړه ږدي.

د طالبانو وياندويانو د ملګرو ملتونو د وياند څرګندونو ته غبرګون نه دی ښودلی.

ځینې راپورونه څرګندوي، چې افغانستان ته د ملګرو ملتونو د مرستیالې امینه محمدي په مشرۍ د لوړپوړي پلاوي د سفر پر مهال د طالبانو مشرانو د ښځو د حقونو ورکولو ته رضايت ښودلی، خو شرط ېې ایښی چې نړیوال دې د دوی حکومت په رسمیت وپیژني او هم دې د دوی پر مشرانو د بهرنيو سفرونو بندیزونه لغوه کړي.

له دې راپورونو وروسته، د طالبانو د بهرنيو چارو وزارت ویاند عبدالقاهر بلخي الجزیرې ټلویزیون ته ویلي، چې د نجونو د زده کړو د ځنډ په اړه د دوی پریکړه وروستۍ نه، بلکې موقتي ده او بیرته به دا زده کړې پیل شي.