تاند:( یکشنبه، د دلوې دویمه) افغان سياستوالې شینکۍ کړوخیل، چې په جمهوري نظام کې د ولسي جرګې غړې او په کاناډا کې د افغانستان سفیره پاتې شوې وه، د طالبانو له امیرالمؤمنین ملا هبت الله اخندزاده سره د دوی د رژيم د لوړو زده کړو د وزیر شیخ ندا محمد ندیم د خپلوۍ د رشتې يادونه کړې ده.
نوموړې په يوه ټلويزيوني مرکه کې وويل ، چې شېخ نديم د ملا هبت الله اخندزاده د خور خاوند دی، ځکه پراخ صلاحيتونه ورکړل شوي او ډېره سخت دریځي کوي.
شینکۍ کړوخیل دا څرګندونې په داسې حال کې کړي، چې د طالبانو د لوړو زده کړو د وزیر په توګه د ندا محمد ندیم له ټاکل کیدو وروسته د نوموړي افراطي څرګندونې او اقدامات زيات شوي دي.
طالبانو د خپلو نورو مشرانو او چارواکو په شان د ندا محمد ندیم ژوند ليک، د زده کړو معلومات او نور جزییات هم نه دي په ډاګه کړي.
ندا محمد ندیم د طالبانو له بيا واکمنيدو وروسته د طالبانو په رژيم کې د ننګرهار والي، امنیه قومندان، د کابل والي او اوس د لوړو زده کړو وزير دی.
د طالبانو په کابينه کې تر نیمايي زیات غړي د لوی کندهار اړوند دي، چې ملا هبت الله، ملا محمد حسن اخند، ملا عبدالغني برادر، ندا محمد ندیم، د دفاع، مالېې، کار او ټولنيزو چارو او ډېرو نورو وزارتونو وزيران ېې د يادونې وړ دي.
د طالبانو چارواکي د سمتي واک د انحصار تر څنګ ځینې منتقدین د څو کورنيو انحصاري حکومت هم بولي.
د طالبانو د موسس ملا محمد عمر مجاهد له کورنۍ څخه د طالبانو په کابينه کې د نوموړي يو زوی محمد یعقوب مجاهد د دفاع او د ملا عمر ورور ملا عبدالمنان عمري د کار او ټولنيزو چارو وزير دی. د طالبانو د چارو ادارې يو مرستيال د ملا عمر زوم یاد شوی.
د دې ترڅنګ د جلال الدين حقاني يو زوی سراج الدين حقاني د طالبانو د کورنیو چارو او د جلال الدين ورور خلیل الرحمن حقاني د کډوالو او بیرته راستنيدونکو چارو وزير دی.
د طالبانو د لوی درستیز مرستیال حاجي مالي خان د جلال الدين حقاني د مېرمنې ورور دی.
د طالبانو په اړه دا خبرونه په داسې حال کې دي، چې دوی د خپلې واکمنۍ يوه لويه لاسته راوړنه د قدرت د انحصار او جزيرو ختمول بولي.
آغلی شینکۍ کړوخیل کله وای چه د طالبانو امیرالمؤمنین ملا هبت الله اخندزاده هیڅ موجودیت نلری. او کله وای چې د ملا هبت الله د خور خاوند شېخ نديم دی.
نه هبت شته او نه کوم جټ .
شاید کوم پنجابی جرنیل یا کرنیل وي چې ځان چاته نه ښکاره کوي .