تاند(شنبه، د جدي ۳۰ مه) د ملګروملتو کارکوونکو په دې بخښنه وغوښته چې په افغانستان کې یې د طالبانو تر بیرغونو لاندې ډله ییز عکس اخیستی دی.
د ملګروملتو د سرمنشي ویندوی سټېفن دوجاریک فکس نیوز تلویزیون ته وویل:«موږ له دې عکسه خبر یوو چې په افغانستان کې د طالبانو له مشرانو سره د سرمنشي د مرستیالې د سفر په لړ کې اخیستل شوی دی. د سرمنشي د مرستیالې د ساتونکو عکس داسې مهال اخیستل شوی چې هغې په خونه کې له طالب مشرانو سره خبرې کولې او ساتونکو یې دباندې انتظار ایست.»
دوجاریک ټینګار وکړ:«دا عکس باید نه وای اخیستل شوی. دا یوه تېروتنه وه، او موږ په دې خاطر بخښنه غواړو.»
دا عکس لومړی پلا د پنجشنبې په شپه په ټولنیزو رسنیو کې خپور شو. او عکس العملونه یې وپارول.
د چارو ځینې شنونکي وايي، که طالبانو د افغانستان د ملي او تاریخي بیرغ پر ځای خپل ګوندي بیرغ نه وای تحمیل کړی، اوس به نه یوازې له طالبي بیرغه دومره بیزاري نه څرګندېده، بلکې د افغانستان سفارتونه، ملي سپورتي ټیمونه او په بیلابیلو هیوادونو کې د افغانستان نمایندګۍ به د دوی په حکومت پورې اړوند ګڼل کېدې.