د پاکستان ولسمشر عارف علوي وايي، اسلام اباد غواړي چې افغان کډوال په باعزته ډول خپل هېواد ته ستانه شي.
نوموړي نن په اسلام اباد کې د قرنطین له امله زیانمنو کډوالو ته د مرستو د وېش پر مهال دا خبره کړې ده او ويلي یې دي افغانانو ته یې د خپل هېواد دروازې له لسیزو راهیسې ځکه پرانیستې دي چې دا هېواد جګړه ځپلی دی.

ښاغلي علوي زیاته کړې، پاکستان په افغانستان کې ژر تر ژره د پایداره سولې تینګښت غواړي: (( پاکستان او ترکیې د اسلامي جذبې له مخې افغانانو او سوري کډوالو ته په خپله خاوره کې دژوند زمینه برابره کړې ده، موږ د کورونا په بحران کې له کډوالو سره مرستو ته ژمن یوو.))
نوموړي افغان کډوالو ته د اختر مبارکي ورکړې او هېواد ته د ستنېدو لپاره یې هڅولي دي.

دا په داسې حال کې ده چې تر اوسه افغان کډوال وايي، پاکستاني حکومت په کمپونو کې قرنطین کړي دي او د ژوند او روزګار لپاره یې راوتلو ته نه پرېږدي.

همدا راز نړیوالو سازمانونو د کډوالو لپاره یو څه مرستې پاکستان ته ورکړې دي خو دغه هیواد افغان کډوالوته نه دي رسولي.
د شمېرو له مخې په پاکستان کې دا مهال ۳نیم میلیونه افغانان په قانوني او غیر قانوني ډول ژوند کوي.