تاند- د نړۍ تر ټولو سترې الوتکې یو وار بیا تجربوي الوت وکړ او دا ځل ۶ ساعته په هوا کې پاتې شوه چې یو ریکارډ دی.

دا الوتکه، چې راک نومېږي، ستراتولنچ  (Stratolaunch) کمپنۍ جوړه کړې ده.

دا الوتکه ۱۱۷ متره اوږده ده او وزرونه یې د فوټبال د میدان هومره دي.

دې الوتکې د جون په نهمه هم د کلیفورنیا ایالت له مجاوې دښتې (Mojave Desert) ازمېښتي الوت کړی و خو تر ټاکلي وخت ژر بېرته پر مځکه کښېناسته.

د سپېس ویبپاڼې د راپور له مخې، د نړۍ دې تر ټولو سترې الوتکې دا ځل ۶ ساعته پرواز وکړ.

دا د دې الوتکې، چې دوه باډۍ لري، نهم تجربوي الوت و. خو دا دوهم ځل دی چې دا الوتکه د (Talon-A) په نوم د ستراتو لنچ کمپنۍ تر غږ چټکه هوايي نفلیه وسیله لوړوي.

ستراتولنچ کمپنۍ تېر ځل ویلي و چې الوتکه یې ژر د دې لپاره کښېنوله چې د هغې معلومات یا ډاټا وڅېړي او بل الوت ته یې چمتو کړي.

خو ستراتو لنچ کمپنۍ نه دي ویلي چې بل الوت یې ولې دومره په ځنډ وکړ.