تاند:( دوشنبه، د جدي ۲۶) جاپان وايي، چې د افغانستان د روغتيايي خدمتونو د پياوړتيا لپاره ېې ۱،۳ ميليونه ډالره مرسته کړې ده.
د جاپان د حکومت په يوه اعلاميه کې راغلي، چې دا مرسته د ښځو او نجونو، په ځانګړي ډول د ولادت لرونکو مېرمنو د روغتيايي خدمتونو لپاره شوې ده.
ويل شوي، چې ياده مرسته د هلمند ولايت لپاره شوې، څو د ۲۹ روغتیايي مرکزونو خدمتونه ورسره فعاله او پياوړي وي.
د راپور له مخې، د جاپان دا مرسته د ملګرو ملتونو د وجهي صندوق له لارې لګول کېږي.
جاپان د افغانستان له همېشنیو مرستندویه هېوادونو څخه دی، چې تر ډېره یې مرستې بشري بڼه لري.