تاند- په سویس کې څېړونکو داسې وسیله جوړه کړې چې له هوا او د لمر له وړانګو هایدروجن جوړوي.
هایدروجن د پاکې انرژۍ لپاره کارول کېږي.
دوی دا وسیله له طبیعي فوټو سینټز څخه په الهام جوړه کړې ده.
د یورو نیوز له راپور سره سم، سویسي څېړونکي وايي، دا کوچنۍ وسیله یوې پاڼې ته ورته ده او دوی هیله لري چې د تجدیدوونکې انرژۍ د زېرمه کولو ستونزه به د تل لپاره حل کړي.
نن سبا په نړۍ کې د لمر او باد په شان تجدیدونکېو انرژیو ته پام ډیر دی ځکه چې د فوسیلي انرژیو په شان هوا نه ککړوي.
د نړۍ په یو شمېر هیوادونو کې څېړونکي له کلونو راهیسې د داسې انرژۍ د تولید په لټه کې دي چې اقلیم ته زیان نه پېښوي.
د سویس د (EFPL) پوهنتون څېړونکی کوین سیوولا وايي، د هوا له کاربون ډای اوکسایډ څخه د طبیعي فوټوسنټیز عملیه د لمر په وړانګو او بیا د قند له تولید سره تړلې وي.
دی وايي چې دوی هم غوښتل چې دا کار وکړي یعني د لمر وړانګه او اوبه له هوا واخلي او د لمر انرژي د هایدروچن په بڼه زېرمه کړي.
که څه هم تر دې مخکې د مصنوعي فوټوسنټیز عملیه ښودل شوې، خو د سویسي څېړونکو نوې ټکنالوژي دوې ستونزې له منځه وړي یوه له هوا څخه د اوبو اخیستل او بل د لمر په وړانګو د کیمیايي انعکاس د انرژۍ برابرول.
دا څېړنه په اډوانسډ مټریالز نشریه کې خپره شوې ده.