تاند:( جمعه، د جدي ۲۳) په پنجشېر کې د عدليې د مخکيني وزير فضل احمد معنوي کور اور اخیستی دی.
نوموړي په خپله ټویټر پاڼه کې لیکلي، چې دا سوزيدلې ۵ پوړيزه ودانۍ یې کور نه؛ بلکې کتابتون و، چې د څو پېړيو مهم لرغوني اثار هم پکې شامل وو.
معنوي طالبان په قصدي ډول په دغه اور لګولو تورن کړي، خو د طالبانو ځايي چارواکو ویلي چې پېښه د بريښنا د شارټۍ له امله رامنځته شوې ده.
ويل کيږي، چې په دغه ودانۍ کې د طالبانو امنيتي ځواکونو ځانته امنيتي پوسته جوړه کړې وه.
په ټولنیزو رسنیو کې خلکو په دې اړه ډېر غبرګونونه ښودلي.
يو شمېر خلکو طالبان د پخوانيو چارواکو د کورونو په غصب، ناوړه استفادې او علم و کتاب سره په دښمنۍ تورن کړي، خو ځينو نورو بيا پر معنوي نیوکې کړي چې د غره لمنه کې ېې داسې ودانۍ په کومو امکاناتو جوړه کړې وه.