تاند:( سې شنبه، د جدي ۲۰) د طالبانو د رييس الوزرا د اقتصادي مرستیال ملا عبدالغني برادر دفتر وايي، چې د دوی له واکمنيدو سره د افغانستان صادرات په بېساري ډول زيات شوي.
دغه دفتر په خپرو کړو معلوماتو کې ليکلي:«د ۱۴۰۱ کال په لومړیو ۹میاشتو کې د صادراتو کچه ۱۴۲۴میلیون ډالرو ته رسېدلې. په داسې حال کې چې د تېرې ادارې د ۱۳۹۹ او ۱۴۰۰ کلونو په لومړیو ۹میاشتو کې د صادراتو کچه په ترتیب سره۴۳۴ او ۴۷۸ میلیون ډالره وه.»
د طالبانو منتقدین بيا وايي، چې د طالبانو له واکمنيدو سره د افغانستان پر کانونو او نورو زېرمو چور روان دی او په ارزانه او غیر تخنيکي ډول د کانونو استخراج او صادرات روان دي.
د طالبانو چارواکي بیا په دې اړه ادعاوې بې بنسټه بولي.
طالب چارواکو د صادراتو د زیاتېدو له اعلان سره، د دغو صادراتو په اړه نور جزییات نه دي ورکړي.