تاند:( دوشنبه، د جدي ۱۹) د طالبانو د حاکمې ادارې یو پلاوی د آمو سیند د ویجاړیو له څېړلو وروسته وايي، چې دغه سیند د افغانستان ۲۵ کیلومتره خاوره لاندې کړې او د سرحدي سیمو اوسیدونکیو ته یې مالي زیانونه اړولي دي.
د آمو سیند له کلونو راپدیخوا د افغانستان خاوره وړي او ډېرې یې ځمکې پر سیند ور ګډې کړې دي.
د طالبانو اداره وايي په وروستیو کې ېې د هېواد شمال ته د ګڼو وزارتونو د استازیو په ګډون یو پلاوی لېږلی.
پلاوی وايي؛ څېړنې یې ښيي، چې آمو سیند د افغانستان ۲۵ کیلومتره خاوره لاندې کړې او که د سیند غاړې پخې نه شي د نورو ویجاړيو وېره هم شته.
د طالبانو د کرنې او مالدارۍ وزیر عطاء الله عمري وایي: په ځینو ځایونو کې ۱۵ کیلومتره او ان ۲۵ کیلومتره افغان خاوره هغه لوري ته تللې ده.
د طالبانو د انرژۍ او اوبو وزارت مرستیال مجیب الرحمن ویلي ، چې د دوی د کابینې له خوا دوه میلیارد افغانۍ د زیان د سملاسي مخنیوي له پاره ځانګړې شوي دي.
د طالبانو د قومونو او قبایلو چارو وزارت مرستیال محمد اسماعیل ویلي؛ زیانمن شویو خلکو ته به د ژوند د ښه کولو زمینه برابره شي او صفري ټکي به وټاکل شي.
پلاوي د ځایي خلکو له قوله ویلي، چې افغان خاورې ته د آمو سیند را مخکې کيدو دوی ته هم مالي زیانونه اړولي.
د پرزول شوي جمهوري نظام یوې لوړپوړې سرچينې تاند ته وويل، چې تاجيکستان او یو شمېر نورو ګاونډيو هېوادونو له ډېرو کلونو راهيسې د افغان خاورې د لاندې کولو لپاره آمو سیند ته د خپلو نړول شويو ودانيو ساختماني او نور اضافي توکي غورځول، څو سیند شاته وتمبوي او د دوی د جغرافيوي حدود پراخ شي.
سرچینه زیاتوي، چې په دې اړه ډېر مستند اسناد موجود وو، خو له دې کبله چې د افغانستان امنيتي شرايط ښه نه وو او ګاونډيو هېوادونو له طالبانو پراخ ملاتړ کاوه، جمهوري نظام د ځينو سرحدي سيمو په احتمالي سقوط کې طالبانو سره د ګاونډيو هېوادونو د همکارۍ د مخنيوي لپاره په دې اړه «موقتي مصلحت» غوره بللی و.