تاند:( پنجشنبه، د جدي پینځلسمه) د ترکیې د بهرنیو چارو وزیر داوود چاوش اوغلو له خپل قطري سیال محمد بن عبدالرحمان آل ثاني سره د افغانستان د اوسني وضعيت په اړه ټليفوني خبرې وکړې.
ترکي رسنۍ وايي په دې خبرو کې د طالبانو د ادارې له لوري د ښځو د زده کړو او کار په اړه د بندیزونو په پای ته رسېدو او له سیاسي ګوندونو سره د طالبانو د خبرو د پيل او هڅولو په تړاو بحثونه شوي.
ترکېې د بهرنيو چارو وزير په دې برخه کې د اسلامي همکاریو سازمان همکاري هم اړينه ګڼلې ده.
تېره مياشت امریکا، پاکستان، هندوستان، تاجيکستان، ترکمنستان، چین، ترکیه، عربستان، ازبکستان او قطر هغه هېوادونه وو، چې د افغانستان د وضعيت په اړه ېې خپلمنځي خبرې سره کړي.
د نجونو او ښځو پر وړاندې د طالبانو د ادارې افراطي بنديزونه، له افغانستان څخه د تروريستي ډلو د فعالیت ادعاوې او نورو هېوادونو ته یې ګواښونه او په افغانستان کې د ټول شموله حکومت جوړیدل د دغو خبرو اصلي ټکي جوړوي.