تاند:( سې شنبه، د جدي شپږمه) د پکتيکا په برمل ولسوالۍ کې ۳۸ زلزله ځپلو کورنيو ته کورونه جوړ شول.
د ياد شوي ولايت د طبيعي پېښو پر وړاندې د مبارزې طالب رييس مطيع الله منصور وايي چې دغه کورونه د ترکيې خيريه بنسټ په مالي ملاتړ د ۵۰۰ زرو ډالرو په لګښت جوړ شوي چې پرون خپلو مالکانو ته وسپارل شول.
سرچینې د نورو بې کوره شویو خلکو د کور جوړولو په اړه څه نه دي ويلي.
د پکتیکا په برمل او ارګون ولسواليو کې څو مياشتې مخکې سختو زلزلو د زرګونو تنو د مرګ ژوبلې تر څنګ سلګونه کورونه ونړول، چې د ځينو کورنيو بنسټونو تر څنګ ورته نړیوالو بنسټونو د کورونو د بیرته رغولو خبر ورکړی و.
څه موده مخکې يو شمېر نورو کورنيو ته د مشهور افغان کرکټ لوبغاړي راشد خان ارمان د بنسټ له لوري کورونه جوړ شوي وو.