تاند (شنیه، د جدي ۳ مه) ایران وايي، د نجونو د پوهنتوني زده کړو د مخنیوي په اړه د طالبانو د وروستۍ پرېکړې په نتیحه کې د افغان نجونو د زده کړو د ستونزې له هواري سره مرستې ته تیار دی.
د تېرې اوونۍ د سې شنبې په ورځ د طالبانو د لوړو زده کړو وزیر تر نامعلومې مودې پورې د نجونو پرمخ پوهنتونونه هم بند کړل. دې پرېکړې په هیواد کې دننه او له هیواده دباندې سخت غبرګونونه وپارول.
د ایران د بهرنیوچارو وزارت د لوېدیځې اروپا عمومي ريیس رسول موسوي پر خپله ټویټرپاڼه کښلي چې په تهران کې یې د افغانستان د سفارت له سرپرست عبدالقیوم سلیماني سره د افغانستان په پوهنتونونو کې د نجونو محصلانو د زده کړو د ځنډېدو په اړه خبرې کړي دي.
موسوي لیکلي چې عبدالقیوم سلیماني ته یې ویلي چې ایران حاضر دی چې د افغان نجونو د زده کړو د دوام ستونزه په بیلابیلو طریقو لکه انلاین زده کړو له لارې حل کړي.
تر دې مخکې د ایران د بهرنیو چارو وزارت ویاند د طالبانو له لوري د نجونو د زده کړو پر مخنیوي خواشیني ښکاره کړې وه او له طالبانو یې غوښتي و چې نجونو ته د زده کړو لار ژر تر ژره هواره کړي.