تاند:( پنجشنبه، د قوس څلور ويشتمه) د طالبانو د حاکمې ادارې وياند ذبيح الله مجاهد د سپین بولدک-چمن د نننۍ نښتې له امله هم پاکستان پړ وباله.
نوموړي په خپله ټویټر پاڼه لیکلي، چې دغه نښته يو ځل بيا د پاکستاني ځواکونو په ډزو پيل شوې ده.
مجاهد زياتوي، چې دوی خبرې اترې د ستونزو معقول حل بولي او منفي ګامونه او پلمې هیڅ لوري ته په ګټه نه بولي.
په سپینبولدک کې نن د روانې اونۍ په ترڅ کې په دویم ځل د طالبانو او پاکستاني ځواکونو تر منځ نښته وشوه.
د لومړنیو راپورونو له مخې، طالبانو په شېرو اوبو سیمه کې پوسته جوړوله چې له هغې غاړې پرې ډزې پیل شوې.
د یکشنبې په ورځ هم په ورته دلیل پاکستاني پوځیانو په دې سیمه کې پر طالب ځواکونو برید کړی و چې په نتیجه کې یې دواړو خواوو ته ۱۰ تنه ووژل شول او شاوخوا ۳۰ نور ژوبل شول.
د نننۍ پېښې په اړه پاکستاني رسنیو د خپلو پوځي سرچینو په قول ویلي چې له افغانستان څخه د دوی خوا ته ډزې شوي چې ډیورند کرښې ته څېرمه په موسي کلي کې د خلکو پر کورونو لګېدلي دي.
پاکستاني رسنیو د خپلو چارواکو په قول ویلي، د ډزو په نتیجه کې د چمن په موسي کلي کې د ۲ ښځو په ګډون ۱۲ ملکي وګړي ژوبل شوي او یو تن وژل شوی دی.
د پاکستان د ملېشه ځواک یوه قوماندان پاکستاني رسنیو ته ویلي چې د طالبانو د ډزو په ځواب د پاکستان پوځ هم د افغانستان خوا ته ډزې وکړې.
زه فکر کوم دا د دواړو اړخو دستوري جګړې دي تر څو د ډیورینډ کرښې ته د رسمیت بڼه ورکړي. دا د انګریز او د هغوی د غلامو پنجابیانو پخوانی تکتیک دی تر څو نړیوالو ته وښایي چې دلته هره ورځ جګړې کیږي او ددې موضوع اساسي حل د کرښې رسمیت پیژندل وګڼي.