تاند:( دوشنبه، د قوس یوویشتمه) د کندهار لپاره د طالبانو د ادارې چارواکو ویلي، چې په سپین بولدک -چمن کې له پاکستان سره د افغانستان د تګ راتګ لاره له پرونۍ نښتې وروسته بیرته پرانیستل شوې ده.
ياده لاره پرون د طالبانو او پاکستاني ځواکونو د نښتې له امله تړل شوې وه.
د تاند د تېرې شپې د معلوماتو له مخې، د يادې نښتې د وژل شويو کسانو شمېر ۷ او د ټپيانو ۳۱ تنو ته رسېدلی.
د کندهار لپاره د طالبانو د والي ویاند ویلي، د سپین بولدک – چمن ترمنځ د شېرو اوبو په سیمه کي له پاکستاني ځواکونو سره د جګړې په نتیجه کې د دوی خوا ته یو سرتېری شهید شوی او د درېیو ملکي وګړو په شمول لس نور ټپیان دي.
د پاکستان پوځ په یوه خبرپاڼه کې ویلي چې په چمن کې ۶ ملکیان وژل شوي او ۱۷ نور ژوبل شوي دي.
د پاکستان پوځ د خپلو ځواکونو د مرګ ژوبلې په اړه څه نه دي ویلي.
له دې سره په افغانستان کې د پاکستان مخکیني سفیر او د پاکستان د بهرنيو چارو وزارت کې د افغانستان په اړه لوړپوړي ديپلومات منصور احمد خان د ورته نښتو د بدو پایلو خبرداری ورکړی.
نوموړي د دغې نښتې له غندلو سره ویلي، چې په دې اړه بايد د طالبانو ادارو سره مخامخې خبرې وشي.
د منصور احمد خان په باور، يادې نښتېپه سیاسي، سوداګريزه، ترانزیتي او نورو برخو کې د اړيکو او همکاريو د خرابيدو سبب کیږي.
د طالبانو د قطر سیاسي دفتر مشر سهيل شاهين د يادې نښتې په اړه د پلټنو د پیل خبر ورکړی.