تاند(سې شنبه، د قوس ۱۵ مه) د بشري حقونو د څار سازمان وايي، د طالبانو تر کنترول لاندې افغانستان دې تر هغو پورې په سپورتي سیالیو کې له ګډونه منع کړي چې طالبانو ښځو او نجونو ته د سپورت اجازه نه وي ورکړې.
د بشري حقونو د څار سازمان دا غوښتنه وروسته له دې وکړه چې د طالبانو د حکومت د امربالمعروف وزارت سپورتي ځایونو ته د ښځو پر تګ بندیز ولګاوه.
د بشري حقونو د څار سازمان همداراز وویل چې د المپیک نړیواله کمېټه باید په دې اړه پرېکړه د خپل اجراییه بورد په راتلونکې غونډه کې وکړي.
ټاکل شوې ده چې د المپیک نړیواله کمېټه نن (سې شنبه) د سویس په لوزان کې غونډه وکړي.
د بشري حقونو د څار سازمان ویلي چې طالبانو د تېر کال په اګست کې له واک ته رسیدو وروسته له کار کولو او زده کړو منع کړې او اوس یې د هغوی پر سپورت هم بندیز لګولی دی.
دې سازمان د طالبانو دا اقدام د بشري حقونو د نړیوالو قوانینو او همداراز د المپیک د منشور سرغړونه بللې ده.
د المپیک منشور یا چارتر په سپورت کې هیڅ راز تبعیض نه مني.
د المپیک نړیوالې کمېټې د ۱۹۹۹ په اکتوبر کې د افغانستان د المپیک نړیواله کمېټه تر ۲۰۰۳ پورې په دې خاطر وځنډوله چې طالبانو ښځې له سپورت کولو منع کړې وې.