تاند(سې شنبه، د قوس ۱ مه) د هند د ملي امنیت سلاکار اجیت دوول به نن په نوي ډیلي کې د قزاقستان، قرغیزستان، تاجکستان او ازبکستان د ملي امنیت له سلاکارانو سره وویني.
د هندي رسنیو د راپور له مخې، د دې غونډې د خبرو تر ټولو مهمه موضوع به د افغانستان امنیتي وضعیت وي.
راپور وايي، د افغانستان وضعیت د دې یو ورځینۍ غونډې د ټولو ګډونوالو لپاره د اندېښنې وړ دی او له همدې کبله به پرې ژورې خبرې وکړي.
د هند او منځنۍ اسیا د څلورو هیوادونو د ملي امنیت د سلاکارانو دا غونډه د هند، ازبکستان، تاجکستان، ترکمنستان او قرغیزستان د سږ کال د جنورۍ د میاشتې د مشرانو غونډې په رڼا کې جوړېږي.
د دې غونډې په اجنډا کې بله مهمه موضوع د منځنۍ اسیا له هیوادونو سره د هند په وصلېدو کې د ښه والي د راوستلو لارې چارې دي.
د هندي چارواکو په وینا له دې کبله د چاه بهار پر اهمیت به یو وار بیا تینګار وشي.
هند د منځنۍ اسیا له هیوادونو سره اړیکو ته له دې کبله هم اهمیت او پراختیا ورکوي چې په دې سیمه کې د چین د پراخېدونکي حضور مقابله وکړي. دا هیواد له همدې کبله پر افغانستان د منځنۍ اسیا له هیوادونو سره د همکارۍ د زیاتولو هڅه کوي.
د طالبانو له واک ته رسیدو وروسته ګومان کېده چې د افغانستان او هند اړیکې به ډیرې سړې شي او د چاه بهار بندر له لارې له منځنۍ اسیا او افغانستان سره د هند سوداګري به هم په ټپه ودریږي خو هند په وروستیو کې له دې لارې د منځنۍ اسیا ته خپل یو شمېر سوداګري مالونه صادر کړل.