تاند(سې شنبه، د قوس ۱۵ مه) د راپورونو له مخې، د مزارشریف ښار په درېیمه ناحیه کې نن سهار د یوه بس په لاره کې په چاودنه کې لږترلږه ۶ تنه وژل شوي او ۷ نور ژوبل دي.
د بلخ د امنیه قوماندانۍ ویندوی اصف وزیري وايي، چاودنه د سیداباد په سیمه کې پر هغه بس شوې چې د حیران د نفتي موادو کارکوونکي یې لېږدول.
د وزیري په وینا، لومړني معلومات ښيي چې چاودنه د سړک د غاړې د ماین وه.
ده دا هم وویل چې ممکن د مرګ ژوبلو شمېر تر دې ډېر وي.
تراوسه پورې د دې برید مسوولیت کومې دلې په غاړه نه دی اخیستی.
تر دې وړاندې د سمنګان د مرکز ایبک په یوه مدرسه کې چاودنې لږترلږه ۱۹ تنه ووژل او ۲۴ نور ژوبل کړل.
مزارشریف د طالبانو تر واکمنۍ وړاندې هم نسبتاً امن ښار و او ډیرې لږې چاودنې پکې کېدې.