تاند:( چار شنبه، د قوس دويمه) د پاکستان د کډوالو او سرحدي چارو وزير په دغه هېواد کې د مېشتو افغان کډوالو د ثبت بهير د پيلولو خبر ورکړی.
وزير «محمود طلحه» د خپل هېواد پارلمان ته وویل، چې په دې بهیر کې به نا ثبت شوي افغان کډوال ثبت کړي.
د نوموړي په وينا، پاکستان کې ۱،۲ ميليونه غیر ثبت شوي افغان کډوال ژوند کوي.
د هغه په وينا، په دې بهير کې به ثابته شي، چې د طالبانو له بيا واکمنيدو وروسته څومره افغان کډوال پاکستان ته راغلي دي.
پاکستان مخکې ويلي وو، چې د طالبانو له بيا واکمنيدو وروسته په خپله خاوره کې نور افغان کډوال نه مني.
په وروستيو کې له پاکستان څخه افغان کډوالو سره د ناوړه چلند ویډیو ګانې خپریږي.
څارونکي باور لري، چې د افغان کډوالو له ځورولو او ثبت سره پاکستان له نړيوالو سازمانونو څخه د دوی په نوم د اضافي نورو مرستو او امتيازاتو غوښتنه کوي.