تاند:( سې شنبه، د قوس لومړۍ) د نيمروز لپاره د طالبانو ځايي چارواکو ویلي، چې ایران تېره مياشت يوازې د دغه ولايت په وریښمو لارې نيږدې ۵۰ زره افغان کډوال بیرته خپل هېواد ته ستانه کړي دي.
سرچينه زياتوي، چې د دغو کسانو له شاوخوا ۷ نیم زره تنو سره ېې د مهاجرت نړيوال سازمان د نقدي پيسو او خوراکي توکيو مرسته هم کړې ده.
د طالبانو له واکمنيدو سره شاوخوا دوه میلیونه افغانان ایران ته تللي، چې يوه لويه برخه ېې بېرته شړل شوي دي.
د ايران تر څنګ په سلګونه زره نور افغان پناه غوښتونکي پاکستان، ترکېې، تاجيکستان او یو شمېر نورو هېوادونو ته هم تللي، چې هره ورځ ورسره د اړوندو هېوادونو د ناوړه چلند ویډیو ګانې خپریږي.
څارونکي د افغانستان ګاونډيان او د سیمې نور هیوادونه د افغان کډوالو په سر په سوداګرۍ تورنوي او وايي، چې په لوړه بیه خپلې ويزې پرې پلوري او په خپله خاوره کې ېې د موجودیت له ثبتولو وروسته بیرته شړي، خو نړيوالو ادارو نه ېې په نوم مرستې او پیسې ترلاسه کوي.
په افغانستان کې له خپلو مخالفانو سره د طالبانو تشدد، بېساری اقتصادي او بشري ناورين، د نجونو د ښوونځيو تړل، د سلګونه زره تنو بې کاري او پر راتلونکي بې باوري له افغانستان څخه د کډوالۍ د سېلاب اصلي لاملونه ګڼل کېږي.