تاند:( دوشنبه، د عقرب دېرشمه) د افغانستان لپاره د پاکستان ځانګړي استازي محمد صادق خان د طالبانو د روغتيا وزير ډاکټر قلندر عباد سره د افغان ډاکټرانو د روزنې په اړه د هوکړې خبر ورکړی.
نوموړي په یو لړ ټویټونو کې لیکلي، چې سمدستي یې پاکستان ته د شلو افغان ډاکټرانو د راتګ او روزلو په اړه هوکړه ليک لاسليک کړی.
صادق خان زیاتوي، چې د پېښور خيبر روغتون په کابل، جلال اباد او لوګر ولايتونو کې د خپلو څانګو د پرانیستلو پلان هم لري.
د هغه په وينا، په دغو پرانيستل کيدونکو څانګو کې به د افغان ډاکټرانو لپاره د عملي روزنې اسانتياوې برابرې شي.
د طالبانو ادارې په دې اړه څه نه دي ويلي.
ويل شوي، چې د دوی د روغتيا وزير پاکستان ته په سفر تللی او پر روغتيايي مسايلو ېې پاکستاني چارواکو سره خبرې کړي دي.
د روغتيايي چارو افغان شنونکي باور لري، چې له افغانستان څخه د روغتيايي کادرونو پر وړاندې د ننګونو او هېواد پريښودو ته د مچبورولو تر شا پاکستان لاس لري، څو افغان ناروغان ورته په ورتلو محتاجه او له دې اړخه پراخې ګټې ترلاسه کړي.
شنونکي د طالبانو پر چارواکو نيوکه لري، چې د پاکستان د لمن نيولو پر ځای نړيوالو سره د تعامل وړتیا پیدا او افغانستان ته په پراخه کچه نړیوالې مرستې جلب کړي.