تاند(شنبه، د عقرب ۲۸ مه) پاکستاني طالبانو د جنګي فعالیتونو د زیاتولو ترڅنګ تبلیغاتي فعالیتونه هم پراخ کړي دي.
په خیبر پښتنوخوا کې خلک وايي چې له څو اوونیو راهیسې د ټي ټي پي له لوري راډیويي خپرونې پیل شوي دي.
د ځايي اوسېدونکي وايي چې پاکستاني طالبان د پاڅون په نوم خپله راډیويي خپرونې د انترنیټ له لارې خپروي.
د دوی په وینا په دې یو ساعته خپرونو کې د تحریک له مشرانو سره مرکې او د جنګي عملیاتو خبرونه شامل دي.
د پاکستاني طالبانو په پاڅون خپرونه کې پر پاکستاني پوځیانو بریدونو ته د بلنې ترڅنګ د ټولو بندیانو د خلاصون غوښتنه کېږي.
تر دې پخوا په نولس سوه نوي یمه لسیزه کې پاکستاني طالبانو وروسته له دې چې سوات ونیوه، راډیويي خپرونې پیل کړې. د هماغه خپرونو له کبله د طالبانو د وخت مشر ملا فضل الله په ملا راډیو مشهور شو.
د چارو کتونکي وايي، د دې لپاره چې اوس طالبان په جوماتونو کې جګړې ته خلک نه شي بللی ځکه چې پر جوماتونو د پوځ او استخباراتو څار ډیر دی، راډیو د دوی لپاره د کسانو د جلب و جذب لپاره ښه وسیله ده.
په همدې حال کې پاکستاني طالبانو د پوځ او امنیتي ځواکونو خلاف بریدونو ته شدت ورکړی دی.
تر ټولو په وروستي برید کې، چې پرون مازدیګر وشو، شپږ تنه ووژل شول.
د رویټرز اژانس د راپور له مخې، دغه چاودنه د جنوبي وزیرستان په چمکالۍ سیمه کې شوې ده.
د پاکستان د پولیسو یوه چارواکي سلیم مروت وویل، د چاودنې هدف پنځه تنه پخواني افراطي وسله وال وو، چې تازه له حکومتي ځواکونو سره ملګري شوي دي.