تاند:( چارشنبه، د عقرب پینځه ويشتمه) د طالبانو د کانونو او پټرولیم وزارت سرپرست شهاب الدین دلاور په کابل کې د اروپايي ټولنې له سفیرې مېرمن رافیلا سره په خپل کاري دفتر کې ليدلي.
د کانونو او پټرولیم وزارت په یوه خبرپاڼه کې ویلي، چې په دغه کتنه کې شېخ دلاور اروپايي سفیرې ته د افغانستان د طبیعي زېرمو، فعالیتونو، عوايدو، روڼتیا، ملي حاکمیت، امنیت او په تېرو ۱۳ میاشتو کې د طالبانو د حکومت په هکله مالومات ورکړل.
نوموړي زیاته کړه، چې د دوی حکومت هڅه کوي تر څو د کانونو په سکټور کې د پانګه والو لپاره لازمې اسانتیاوې رامنځته کړي.
د سرچېنې په وینا، دواړو لور په دغې کتنه کې د یو شمېر نورو موضوعاتو تر څنګ په هېواد کې د روان وضعیت، ستونزو او حل لارو په اړه بحث او خبرې وکړې.
د افغانستان لپاره د اروپايي ټولنې سفیرې په کتنه کې د کانونو او پترولیم وزارت کړنې وستایلې او د هېواد په پرمختګ او اقتصادي وده کې يې د دغه وزارت رول مهم یاد کړ.
نوموړې د کانونو له سکټور سره د همکارۍ د ژمنې تر څنګ له افغانستان سره د بشري مرستو د دوام ډاډ هم ورکړ.
تر دې وړاندې هم طالبانو په افغانستان کې د کانونو پر سکتور د یو شمېر بهرنيو پانګوالو د پانګونې د لېوالتیا خبر ورکړی و ، خو په عمل کې تر اوسه په دې اړه د پرمختګ څه نه دي ويل شوي.