تاند:(پنجشنبه ،د عقرب نولسمه) د طالبانو امنیتي ادارو په کندهار کې د تښتول شویو دوو زده کوونکو نجونو په ګډون د ۳ تښتول شويو کسانو د خوشې کیدو خبر ورکړی.
د تر لاسه شوي راپور له مخې، د کندهار ښار په څلورمه امنیتي حوزه کې دارالمعلمين ته څېرمه کې پرون تښتونکو دوه نجونې تښتولې وې، چې نن د طالبانو امنیتي ځواکونو بیرته پیدا او خپلو کورنيو ته وسپارلې.
دغه نجوني، چې د اتو او لسو کلونو ترمنځ عمرونه لري، پرون له ښوونځي څخه د تګ پر مهال تښتول شوې وې.
د یو بل خبر له مخې، د کاپیسا د کوهستان د دویمې حصې په ولسوالۍ کې پرون طالبانو د يوه سوداګر تښتول شوی زوی له تښتونکو ژغورلی.
د طالبانو د کورنیو چارو وزارت وايي، چې د دې پېښې په تور دوه تنه نیول شوي، چې يو ېې په وسله والو غلاوو او وژنو هم تورن دی.