تاند:(شنبه ،د عقرب څوارلسمه) د پاکستان پخواني صدراعظم عمران خان د پنجشنبې ورځې له وسله وال برید وروسته، چې د حکومت ضدو لاریونو پر وخت پرې ترسره شو او دی ېې سخت ټپي کړ، په لومړۍ وینا کې د پاکستان د اوسني صدراعظم شهباز شريف په ګډون ۴ تنه په دې پېښه کې په لاس لرلو تورن کړي.
نوموړي له خپلو پلویانو غوښتي، چې د شهباز شريف د حکومت خلاف پراخ لاریونونه وکړي.
عمران خان له ډېرو جزییاتو پرته ادعا کړې، چې له دغه برید څخه یوه ورځ مخکې د داسې برید په ترسره کیدو خبر شوی و.
عمران خان، چې څه موده مخکې د پارلمان له لوري ګوښه شو، تازه د پاکستان د ټاکنو کميسيون ورڅخه په ټاکنو کې د بيا ګډون حق اخیستی.
هغه د دې پریکړې او دغه راز له وخته د ژر ټاکنو د ترسره کیدو لپاره د پراخو لاریونونو اعلان کړی.
د پاکستان حکومت دا پېښه غندلې او په اړه يې د جدي پلټنو ډاډ ورکړی.