تاند:(جمعه ،د عقرب ديارلسمه) د افغانستان لپاره د روسیې د ولسمشر ځانګړي استازي ضمیر کابلوف ویلي، چې د افغانستان په اړه د روسیې فارمټ په نوم د سیمه ییزو هېوادونو راتلونکې غونډې ته د طالبانو د حاکمې ادارې استازي نه دي بلل شوي.
کابلوف د دې کار دلېل د سیمه ییزو خپلمنځي بحثونه بللي.
تمه ده، چې دا غونډه د نومبر میاشتې په نیمایي کې تر سره او مسکو ېې کوربه وي.
د ياد شوي فارمټ تېری غونډې ته د طالبانو د رييس الوزرا اداري مرستیال مولوي عبدالسلام حنفي بلل شوی و.
پرون د روسیې د ملي امنیت شورا منشي د هم ګټو هېوادونو په غونډه کې طالبان د امریکا متحده ایالاتو په لاس جوړه شوې ډله وګڼله.
د طالبانو له بيا ځلي واکمنۍ څخه مخکې د دوی پر وړاندې د سیمې او امریکا تر منځ په اړيکو کې انډول ساتل له لویو ننګونو څخه ګڼل کیده.
امريکا ته د طالبانو د نیږدې کیدو ځینې مدافعین دې ته په اشارې سره، چې د سیمې قدرتونو د طالبانو د بيا ځلي واکمنۍ په څه باندې یو کلنه موده کې د امریکا د يوې اونۍ هومره مرسته د دوی واکمنۍ سره نه ده کړې، امريکا ته د طالبانو د نیږدې کیدو ننګه کوي.
له دې سره څېړونکي وړاندوينه کوي، چې امریکا ته د طالبانو له ډېر نیږدې کیدو به دوی ته تاوان دا وي، چې د سیمې هېوادونه ېې ښايي پر ضد نورو ډلو نه ملاتړ وکړي.
طالبانو او امریکا متحده ایالاتو د روسیې د لوړپوړي امنيتي مقام تازه څرګندونو ته غبرګون نه دی ښودلی.