تاند:(چار شنبه ،د عقرب يوولسمه) د طالبانو تر کنټرول لاندې د افغانستان مرکزي بانک په روانه اونۍ کې کابل ته د بشري مرستو د دويمې څلويښت ميليون ډالري کڅوړې د رسیدو خبر ورکړی.
د بانک په يوه اعلاميه کې راغلي، چې يادې پيسې یوه سوداګريز بانک ته سپارل شوي.
د افغانستان بانک چارواکو د يادو مرستو له هرکلي سره، دغه مرستې د افغان بشري ناورين ځپلو د لاسنیوي لپاره مهمې بللې دي.
يادې مرستې، چې نور کله هره اونۍ څلویښت- څلویښت میلیونه کابل ته را لېږدول کېږي، تر اوسه یې د تمويل او مصرف دواړو د جزییاتو په اړه ډېر څه نه دي ويل شوي.
د اقتصادي کتونکو په باور د دغو مرستو له کبله د افغانیو ثبات په خپل حال پاتې شوی او په افغانستان کې له لوږې د ډیرو انسانانو د مړینو مخه نیول شوې ده.
ملګري ملتونه وايي چې دا مرستې د خپلو ادارواو دغه راز د نورو نړیوالو مرستندویو ادارو له لارې ویشي.