تاند:(چار شنبه ،د عقرب يوولسمه) د افغانستان د هوا پېژندنې ادارې په بدخشان، تخار، بغلان او پنجشېر ولايتونو او د پروان په سالنګ ولسوالۍ کې د سختو واورو او ورښتونو وړاندوينه کړې ده.
دغه ریاست پرون په یوه اعلامیه کې وویل، چې دغه واورې او ورښتونه به د عقرب له لسمې تر یوولسمې ووريږي.
سرچېنې د ورښتونو سطحه د ۱۰ او ۱۵ سانتي مترو تر منځ اټکل کړې ده.
افغانستان په دې موسم کې هر کال د داسې ورښتونو شاهد وي.
سږنيو ته یې خلک له دې کبله سخت انديښمن دي، چې بشري او اقتصادي ناورين په شدت سره حاکم دی او د جمهوري نظام د واکمنۍ برعکس طالب چارواکي د طبیعي پېښو زیانمنو سره د مرستې کوم پلان نه لري.
د طالبانو چارواکو او د نړیوالو مرستندویه ادارو مسوولينو له افغانستان سره د ژمي له رارسيدو سره د عاجلو مرستو غوښتنه کړې ده.