تاند:(يکشنبه ،د عقرب اتمه) د طالبانو تر کنټرول لاندې باختر خبري اژانس جرمني ته له هرات ولايت څخه د ۲۰ ټنه جلغوزیو، مميز او پستې د صادریدو خبر ورکړی.
دغه اژانس د هرات د سوداګرۍ خونې د مرستيال سيد مسعود سادات له قوله لیکلي،چې د دغو صادراتو لومړۍ جوپه به ژر جرمني ته واستول شي.
سرچېنې د دغو صادراتو ارزښت شاوخوا نېم میلیونه امریکايي ډالره ښودلې ده.
بل لور ته: د طالبانو د رييس الوزرا سياسي مرستيال مولوي عبدالکبیر د پکتیکا د جلغوزیو له سوداګرو سره لیدلي.
په دې لیدنه کې طالبانو د دغو سوداګرو له قوله چین ته د جلغوزیو د صادراتو د زیاتېدو خبر ورکړی.
ويل شوي،چې مولوي کبير په دې لیدنه کې سوداګرو ته د پوره ملاتړ ډاډ ورکړی.
دا په داسې حال کې ده،چې د طالبانو له بيا واکمنيدو سره له پاکستان څخه د پاکستاني صادراتو په نوم نړيوال مارکيټ ته د افغان جلغوزیو او نورو تولیداتو د صادریدو خبرونه ورکړل شوي.
طالبانو په دې اړه څه نه دي ويلي.