تاند:(يکشنبه ،د عقرب اتمه) د ازبکستان ولسمشر شوکت ميرضايف له نړيوالې ټولنې غوښتي، چې د افغانستان له حاکمو طالبانو سره د خبرو لپاره دې يوه نړيواله ډله جوړه کړي.
نوموړي د اروپايي شورا له رييس «شارل میشل» سره د ليدنې پر مهال دا غوښتنه کړې او ویلي، چې دغه ډله دې د طالبانو حاکمې ادارې سره د هغوی د کړو ژمنو د عملي کیدو په اړه خبرې ورسره وکړي
ازبکستانی ولسمشر او اروپايي مقام د دغې لیدنې پر مهال دغه راز په افغانستان کې د يوه پراخ سياسي بهير د رامنځته کیدو، د بشري حقونو او په خاص ډول د ښځو د حقونو د تامين په اړه ډاډمنیدل او په دې اړه خبرې د افغانستان د دايمي ثبات د تضمين لپاره مهم ګڼلي.
د ازبک ډيلي د راپور په اساس، دواړو لوريو پر دې هم ټينګار کړی، چې افغانستان بايد د سیمې او نړۍ د امنيت لپاره په ګواښ بدليدو ته پرې نه ښودل شي.
له دې مخکې د سیمې د نورو هېوادونو مشرانو هم د افغانستان له وضعیت څخه انديښنه ښودلې او د خبرو له لارې ېې د ټول شموله حکومت جوړيدو غوښتنه پکې کړې، خو طالبانو په پرله پسې ډول داسې خبرې رد کړي او خپله حاکمه اداره ېې ټول شموله ګڼلې ده.