تاند:(شنبه ،د عقرب اوومه) د افغانستان لپاره د امريکا متحده ايالاتو شارژدافیره وايي، چې د افغانستان د نویو بانک نوټونو د چاپ زمینه د دوی په همکارۍ مساعده شوې ده.
کرن دکر په یو لړ ټویټونو کې لیکلي، چې دا همکاري د امریکا د هغو ژمنو یوه برخه وه، چې د نقدو پیسو له کمښت سره د افغانستان د نه مخامخ کیدو په اړه ېې کړې وه.
د هغې په وينا، د دوی د دغې همکارۍ اساسي هدف دا و، چې افغانان د خوراکي او نورو اړینو توکیو د پېرلو لپاره د نقدو پیسو له کمښت سره مخ نه شي.
امریکايي شارژدافیرې له زیاتو جزیاتو پرته دا هم ویلي، چې دغه هېواد او نړیوالو متحدینو یې د نويو افغاني بانکنوټونو د چاپ د لګښت پيسې له افغانستان بانک څخه اړوندو پيسو چاپ کوونکو شرکتونو ته لېږدولي دي.
د افغانستان لپاره د امريکا متحده ايالاتو ځانګړي استازي ټام ويسټ تېره اونۍ وویل،چې د دوی په مرسته افغانستان ته نوي بانکنوټونه چاپ شوي دي.
د طالبانو تر کنټرول لاندې د افغانستان بانک چارواکو ویلي، چې نوي چاپ شوي بانک نوټونه به ژر افغانستان ته ورسیږي.
د نویو بانکنوټونو په اړه تر اوسه بیلا بیل جزییات ورکړل شوي.
ځينو باوري سرچينو تاند ته ویلي، چې افغانستان د جمهوري نظام له سقوط څخه مخکې هم د بانکنوټونو له کمښت سره مخ و او افغانستان بانک ېې د چاپ هڅه کوله.
د سرچينو د معلوماتو له مخې، نوي چاپ شوي بانک نوټونه هم د هماغو هڅو دوام دی او په ډېر ګومان نوي بانکنوټونه د افغانستان د مخکینیو چارواکو له لاسلیکونو او د جمهوري نظام له نوم سره چاپيږي.
طالب چارواکو په دې اړه او هم د نويو چاپ شويو بانکنوټونو د دقیق شمېر په اړه څه نه دي ويلي.