تاند:(شنبه ،د عقرب اوومه) د پاکستان ایکسپریس ټریبیون ورځپاڼې په کندهار کې د پاکستاني طالبانو د تحریک د دوو مشرانو غړو د وژلو خبر ورکړی.
دغې ورځپاڼې د خپلو سرچينو په حواله ویلي، چې وژل شوي کسان اسدالله پهلوان او مدثر اقبال نومېدل او د جلا – جلا پېښو پر مهال وژل شوي دي.
ورځپاڼې په دې اړه نور جزییات نه دي ورکړي او نه ده معلومه، چې دغه پاکستاني طالبان چا وژلي.
څه موده مخکې په پکتیکا کې د پاکستاني طالبانو د یوه بل مشر عمر خالد خراساني د وژل کیدو خبر هم ورکړل شوی و.
پاکستاني چارواکو او په افغانستان کې د طالبانو حاکمې ادارې په دې اړه څه نه دي ويلي.
مخکې د افغان طالبانو ځينو منتقدینو دوی او پاکستاني چارواکي د پاکستاني طالبانو سره په ژورو اړيکو او بیرته یې د ځپلو په مرموزو توطیو تورن کړي وو.