تاند:(سې شنبه ،د عقرب درېيمه) د سره صليب نړيوالې کمېټې د روان میلادي کال له پیله تراوسه په افغانستان کې د ماین چاودنو له امله د ۹۰۲ تنو د مرګ ژوبلې خبر ورکړی.
یادې ادارې په دې موده کې د نیږدې ۴ سوو چاودنو راپور ورکړی او ویلي، چې د زیانمنو ۸۵ سلنه ېې ملکيان دي.
سرچېنې په ورته وخت کې د ټولې مرګ ژوبلې ۴۰ سلنه زیانونه د ماشومانو اړوند ګڼلي.
د ماین پاکولو د یوې موسسې مشر قاري نورالدین رستم خیل ویلي، چې يوازې له تېرو دوو مياشتو راهیسې په مختلفو ولايتونو کې ۱۱ ماين چاودنې شوي.
په وروستيو ماين چاودنو کې د ۹ تنو د وژل کیدو او ۱۵ نورو د ټپي کیدو خبر ورکړل شوی.
له ماین چاودنو او د نړیوالو مرستو له بیساري کمښت سره بیا هم اړونده موسسو په افغانستان کې تېر کال له ۸۶ کيلومتره ځمکې څخه د ماينونو د پاکولو خبر ورکړی.
د ماينونو د قربانيانو او زيانمنو کورنۍ شکايت کوي، چې چا مرسته ورسره نه ده کړې.
د طالبانو چارواکو په دې اړه څه نه دي ويلي.