تاند:(سې شنبه ،د عقرب درېيمه) د کابل سیلو دولتي شرکت لپاره د طالبانو مسوولینو د تېر کال په پرتله د دغه شرکت د عوايدو د دوه چنده کيدو خبر ورکړی.
د دغه شرکت طالب رئیس مولوي نصرالله منصور وویل چې په تېرو شلو کلونو کې د افغانستان سیلوګانو ته دومره پاملره نه وه شوې، خو د طالبانو په راتګ سره سیلوګانې بېرته فعالې شوې.
هغه زیاته کړه:« تېر کال کې د کابل سیلو دولتي شرکت عواید ۳۳ میلیونه افغانۍ وو، خو د اسلامي امارت له راتګ وروسته (د روان کال تر تلې میاشتې) دغه شرکت ۶۱ میلیونه افغانۍ عواید راټول شوي دي.»
د منصور په وینا، ټاکل شوې ده چې د همدې کال تر پای پورې دغه عواید ۲۰۰ میلیونه افغانیو ته لوړ شي.
د کابل سیلو دولتي شرکت رئیس، له دولتي ارګانونو او ادارو څخه وغوښتل چې د دولتي عوایدو د زیاتوالي او په خپلو پښو د هېواد د سیلوګانو د درېدو لپاره دې له دغه شرکت سره همکاري او قرارداد وکړي.
د چارواکو په وینا، اوسمهال دغه شرکت د کورنیو چارو له وزارت او د کابل او پولي تخنیک له پوهنتونونو سره د قراردادونو له مخې ډوډۍ استوي.
د یادونې وړ ده چې د کابل سیلو دولتي شرکت په ۱۳۳۵ لمریز کال تاسیس شو او اوسمهال په کې شاوخوا ۴۰۰ کسان په کار بوخت دي. دغه شرکت (د غنمو د زېرمو کولو، د اوړو د تولید او د ډوډۍ، ناشتا، کیک، روټ کلچې … د پخولو او وېشلو) په برخو کې فعالیت کوي.