تاند:(يکشنبه ،د عقرب لومړۍ) د طالبانو د بهرنیو چارو وزارت د یوه امريکایي پوځي له خوا د افغان ماشومې د تښتولو ادعا ته په غبرګون کې دغه ادعا شوی کار لوی جنایت بللی او ويلي، چې د خلاصون لپاره یې امریکایي حکومت سره جدي خبرې کوي.
سرچينه زياتوي:«له باوري سرچینو څخه د ترلاسه شویو معلوماتو پر بنسټ، د امریکا متحده ایالتونو په ویرجینیا ایالت کې د امریکا سمندري ځواک یوه عسکر (جوشوا ماسټ)، هغه یوازینۍ ژوندۍ پاتې افغان ماشومه له خپلوانو یرغمل او د خپلې کورنۍ د غړی په صفت له ځان سره ساتلې، چې د دوی په بمبار کې یې د کورنۍ ټول غړي په شهادت رسیدلي وو.»
طالبانو دا قضیه د اندېښنې وړ، له انساني کرامته لیرې او بشر ضد کړنه ګڼلې او ويلي،هڅه کوي چې یاده ماشومه بیرته خپلې کورنۍ ته وسپارل شي.
د طالبانو د بهرنیو چارو وزارت د هغو افغان کډوالو په اړه هم جدي اندېښنه څرګنده کړې، چې امریکایانو او متحدينو ېې د جمهوري نظام له سقوط وروسته له افغانستانه ایستلي، خو يو شمېر یې لا د مختلفو هیوادونو په کمپونو کې بې برخلیکه دي.
طالبانو ويلي، چې دغه کډوال له انساني حقونو بې برخې دي.
دوی پر یادو هیوادونو غږ کړی، چې د مهاجرت د نړیوال قانون له مخې او د قونسلي خدماتو له لارې افغان کډوال له انساني او قانوني حقوقو برخمن کړي.
د طالبانو يو شمېر منتقدانو بيا ويلي، چې طالبان ياده ماشومه د کوم برخلیک د لرلو لپاره هېواد ته ورغواړي.
دوی په افغانستان کې پراخيدونکي ورځ تر بلې فقر، د نجونو د ښوونځيو تړل کيدو او نورو ستونزو ته په اشارې ویلي، چې طالبانو په افغانستان کې د خلکو کوم حقونه تامين کړي او دې پوښتنې ته بايد ځواب ورکړي، چې ولې میلیونونه خلک هېواد پريښودو ته اړ وځي؟