تاند(پنجشنبه، د میزان ۲۸ مه) د کندهار ولایت د سپین بولدک ولسوالۍ چارواکي وايي چې د افغان او پاکستان ځواکونو ترمنځ جګړه چې څو ساعته یې دوام وکړ، درېدلې ده.
د سپین بولدک امنیه قوماندان مولوي محمود وايي چې جګړه نن سهار د پاکستاني ځواکونو له لوري پیل شوه او د اسلامي امارت ځواکونو یې ځواب ووایه،
د ده په وینا د طالب ځواکونو له ځوابي ډزو وروسته پاکستاني پوځیانو د افغانستان خاورې ته څلور ځلې هاوانونه وویشتل چې له کبله یې څو تنو ملکیانو ته مرګ ژوبله واوښته.
ځايي اوسېدونکي وايي چې د پاکستاني پوځیانو د هاوان په ګولیو لږترلږه یوه ښځه ټپي شوې ده.
تراوسه پورې د نښتې د علت په اړه څه نه دي ویل شوي.
روانه اوونۍ د نیمروز ولایت د ورېښم پُل په ساحه کې هم د افغان او ایراني پوله ساتو ترمنځ د یوه ساعت په مخه نښته وشوه.