تاند:(چار شنبه ،د ميزان ۲۷مه) د طالبانو د بهرنيو چارو وزارت سياسي مرستيال شير محمد عباس ستانکزي پرون په افغانستان کې د سره صليب نړيوالې کمېټې مشر، ايلوا فيليون (Eloi Fillion) سره لیدلي.
د طالبانو د اعلاميې له مخې، ايلوا ویلی چې ياد سازمان په افغانستان کې له اوکراين وروسته د نړۍ په کچه تر ټولو لوی عمليات لري.
نوموړي وويل چې د روغتونونو، روغتيايي روزنيزو ادارو او توقيف خانو اړوندو خدمتونو تر څنګ د اوبو او انرژۍ، کرنې او بشري مرستو برخې ته هم خپل فعاليتونه پراخوي.
ايلوا زياته کړه چې سږ کال يې په افغانستان کې خپل فعاليتونه د تېر کال په پرتله دوه چنده زيات کړياو په ۲۰۲۳م کال کې یې هم د دغې کچې د ساتنې نيت لري.
د طالبانو مرستيال وزير د سره صليب له نړيوالې کمېټې غوښتي چې د اقتصادي ستونزو تر هواري پورې د افغانستان له خلکو سره خپلو مرستو ته دوام ور کړي.
ستانکزي په عين حال کې د ياد سازمان د فعاليتونو د ښه تر سراوي له پاره د مناسب چاپيريال برابرولو ډاډ ورکړی.
د طالبانو له بيا واکمنيدو سره، که څه هم بشري او اقتصادي ناورين اوج ته رسېدلی، خو ډېرو نړیوالو او بهرنيو مرستندويانو د طالبانو د واکمنۍ د نه مشروعیت له کبله په افغانستان کې خپلې چارې درولي دي.