تاند:(شنبه ،د ميزان ۲۳مه) د روسیې ولسمشر ولادیمیر پوتین دا ځل د لویدیز پر پټو استخباراتي شبکو تور پورې کړی،چې د افغانستان د حاکمو طالبانو د مخالفانو ملاتړ کوي.
د هغه په وينا، لویدیز دغه ډلې د مرکزي اسيا امنيت ګواښلو ته هم هڅوي.
د روسیې ولسمشر په مشخص ډول د امریکا او انګلستان د استخباراتو يادونه کړې، خو په دې اړه ېې نور جزییات نه دي ورکړي.
ولاديمير پوتين په تازه څرګندونو کې دا هم ويلي، چې د افغانستان ناورین د سیمې تر ټولو لویه امنيتي ننګونه ده.
هغه په افغانستان کې د کورنۍ جګړې مخنیوی تر هر څه مهم ګڼلي او په دې اړه ېې خبرداری ورکړی.
د چارو یو شمېر شنونکي بېا په افغانستان کې د روان بحران اصلي ریښه د سیمې د قدرتونو او لویدیز نړیوال جنجالونه بولي.
دوی له افغان سیاستوالو، په خاص ډول د طالبانو له حاکمې ادارې غواړي، چې په افغانستان کې د نړيوالو د نيابتي جګړو او ناندريو د مخنيوي لپاره هر څومره ژر سره جرګه شي او د خپلمنځیو توافقاتو تر څنګ د ملت غوښتنو ته غاړه کېږدي.