تاند:(دوشنبه ،د ميزان ۱۱مه) د پښتونخوا مشهور ملتپال سياستوال افراسياب خټک د طالبانو له لوري د افغانستان د رسنيو پر وړاندې زیاتیدونکو قیوداتو ته غبرګون وښود.
ښاغلي خټک په يوه ټویټ کې لیکلي:« افغانستان باندې د طالبی استبداد ورتپل کیدل د پردیود لاس بریتوب وسیله ده، یو مثال یې رسنۍ/میډیا ده ، چې په شرق یا جنوب کې راډیویي یا ټلویزیوني شبکې تړل کیږی نوځای یې پاکستاني رسنۍ اخلي ، په غرب یا شمال کې به دغه کارایراني یا د مرکزي آسيا شبکې کوي، دا عمل د ګاونډیو غلبې ته لاره پرانيزي.»
دا په داسې حال کې ده، چې نن د طالبانو يوې مخالفې رسنۍ هشت صبح د طالبانو له لوري د دوی د وېبپاڼې پر وړاندې د تخنیکي بندیزونو خبر ورکړ.
د طالبانو له واکمنيدو سره په افغانستان کې د بيان ازادي خورا محدوده شوې، سلګونه رسنۍ تړل شوي، يو شمېر خبریالان وژل شوي او شکنجه شوي او زرګونه نور د هېواد پريښودو ته اړ شوي دي.
له دې سره، د افغانستان اړوند اول لاس خبرونه تر ډېره پاکستاني رسنۍ خپروي او طالبانو سره د ښو اړیکو له کبله افغانستان ته راپور جوړولو لپاره د پاکستاني خبريالانو تګ راتګ زيات شوی او اسانه شوی دی.
طالب چارواکي بیا د بيان ازادۍ د محدوديت او خبریالانو سره د ناوړه چلند په اړه تورونه ردوي.