تاند:(جمعه ،د ميزان ۸مه)‏‌ د کابل په لویدیز کې د نجونو د کانکور ازموینې د چمتووالي پر یوه مرکز نننی ځانمرګی برید په پراخه کچه وغندل شو.

په دې برید کې د طالبانو د کورنیو چارو وزارت د ۱۹تنو د وژل کیدو او ۲۷نورو د ټپي کیدو خبر ورکړ، خو سي این این تلویزیون د روغتيايي سرچينو په حواله ویلي چې د وژل شويو کسانو شمېر ۲۳ او د ټپيانو ۳۶تنه دی.

د طالبانو د ادارې عمومي ویاند ذبیح الله مجاهد دا برید غندلی او د عاملینو د نیولو او مجازات ژمنه یې کړې ده.

بښنې نړېوال سازمان دغه پېښه د طالبانو حاکمې ادارې ته شرمونکې ګڼلې او ویلي،چې‌ د داسې پېښو مسلسل دوام د خلکو په ساتلو کې د دغې ادارې مطلقه ماتې څرګندوي.

له افغانستان څخه د باندې د پرزول شوي جمهوري نظام فعالو دیپلوماتیکو نمایندګیو هم په یوه ګډه اعلامیه کې دا پېښه د طالبانو د ماتې او ناکامۍ نښه ګڼلې ده.

ايران د پېښې ټپيانو ته د روغتيايي مرستو په برابرولو کې د مرستې چمتووالی ښودلی.

د بې واکه شوي ولسمشر محمد اشرف غني لومړي مرستيال امرالله صالح بیا ویلي،چې ځانمرګي بريدونه طالبانو په افغانستان کې رواج کړي.

په ملګرو ملتونو کې د امریکا متحده ایالاتو سفیرې ويلي،چې په برید کې هدف شويو کسانو د روښانه افغانستان لپاره زده کړې او مبارزه کوله.

پخواني ولسمشر حامد کرزي او د مصالحې عالي شورا پخواني رييس ډاکټر عبدالله هم یاد شوی برید غندلی.

د ټولنيزو رسنيو ځینو فعالانو بیا ويلي،چې په غندنو نه څه کیدای شي او نه افغانان او حاکمه اداره ېې د داسې پېښو پر وړاندې له غندنو پرته څه کولای شي.

د دغه برید مسوولیت چا پر غاړه نه دی اخیستی،خو ګومان کېږي چې داعش ډله به ېې پر غاړه واخلي.