تاند:( شنبه ،د ميزان دويمه)د طالبانو د کورنیو چارو وزیر مولوي سراج الدین حقاني د خپلې ادارې ټولو والیانو، ولسوالانو، امنیه قومندانانو او امنیت آمرینو ته امر کړی چې د هېواد د ژورو څاه ګانو سرونه پټ شي.
د هغه وياند عبدالنافع ټکور په يوه ويډيويي پيغام کې ويلي کوم خلک چې د خپلو ژورو څاګانو د پټولو وس نه لري،د یوه هئیت له مخې دې وزارت ته معلومات ورکړل شي ترڅو حکومت ورسره مرسته وکړي.
د طالبانو د کورنیو چارو وزارت څه موده مخکې د ژورو څاګانو کیندونکو ته د څاګانو د پوښلو امر کړی و، خو لاهم له مختلفو ولايتونو څخه دغو څاګانو ته د خلکو د لویدو او تلفاتو راپورونه دوام لري.
خلک د طالبانو له حکومته غواړي چې د ژورو څاګانو پر خاوندانو لازمه کړي، چې برغولی به ورته جوړوي ځکه په ژورو څاګانو کې پر له پسې د ماشومانو او لویانو د لوېدو پېښې رامنځته کېږي.
له تېرو څو ورځو راهيسې په هلمند کې ژورې څاه ته د لویدو له پلوه دا د مړینې درېیمه پېښه ګڼل شوې ده.
ويل کيږي،چې په تېرو څو مياشتو کې له دې کبله شاوخوا دېرش تنه مړه شوي دي.