تاند:( چار شنبه،د سنبلې ۳۰مه) د افغانستان بريښنا شرکت ته څېرمه، د کابل ښار په درېيمه ناحیه کې نن غرمه په يوه رسټورانټ کې چاودنه شوې.
د دغې چاودنې د نوعیت او زيانونو په اړه ضد او نقیضې ادعاوې شوي دي.
د کابل امنیه قوماندانۍ لپاره د طالبانو ویاند خالد ځدراڼ وايي، چاودنې درې ملکي وګړي وژلي او ۱۳ نور ټپيان دي.
د طالبانو د رژيم د کورنیو چارو وزارت ویاند بیا ویلي چې دغه چاودنه د ګاز بالون د چاودېدو له کبله رامنځ ته شوې ده.
ځینې نورې سرچينې وايي، چې د چاودنې په نوعيت نه پوهېږي، خو تر پينځو پورې کسان په دغه چاودنه کې وژل شوي او شاوخوا ۲۰ نور ټپيان دي.
ويل شوي،چې د چاودنې پر وخت د برېښنا شرکت يو شمېر کارکوونکي هم په دغه رسټورانټ کې موجود وو.
د دغې چاودنې په اړه د طالبانو کومې وسله والې مخالفې ډلې تر اوسه څه نه دي ويلي.