تاند:( سې شنبه،د سنبلې ۲۹مه) د عامې روغتيا وزارت د اړوندو نړيوالو بنسټونو په همکارۍ پرون د هېواد په ټولو ولايتونو کې د پوليو واکسين سراسري کمپاين پيل کړ.
د روغتيا وزارت چارواکي وايي، دغه کمپاين څلور ورځې دوام کوي او په دې موده کې ټاکل شوې ده له پنځه کلنۍ څخه ښکته ٩،٩ ميليونه ماشومان د پوليو ويروس پر وړاندې واکسين شي.
دا په افغانستان کې په روان ميلادي کال کې د پوليو واکسين د تطبيق ۸ پړاو دی، مخکې له دې شپږ سراسري کمپاينونه او يو فرعي کمپاين په هېواد کې په برياليتوب سره پلی شوی دی.
روغتیايي چارواکي وايي،افغانستان اوس د بل هر وخت په نسبت د پوليو ناروغۍ له منځه وړلو ته نيږدې شوى.
د روان ميلادي کال له پيل څخه تر اوسه پورې د کونړ او پکتيکا له ولايتونو څخه د پوليو د دوو مثبتو پېښو رپوټ ورکړل شوى، چې د تېرو کلونو په نسبت ډېر کمښت ښيي.
پوليو يوه ويروسي ناروغي ده چې درملنه نه لري او يوازې د واکسين په واسطه د مخنيوي وړ ده، هغه ماشومان چې په دې ناروغۍ اخته شي د دايمي فلج او يا هم د هغوى د مړينې سبب کېږي.
د يادوني وړ ده چې افغانستان او پاکستان اوس هم د نړۍ په کچه هغه هېوادونه دي، چې د پوليو له ويروس څخه خلاص شوي نه دي.