تاند:( سې شنبه،د سنبلې ۲۹مه) د کندهار لپاره د طالبانو د ادارې امنیتي چارواکي وايي چې د مرکز په ګډون په ټولو ولسوالیو کې چاڼيز عملیات تر سره کوي تر څو امنیت لا ښه شي.
طالب چارواکو دا یو مثبت ګام بللی او ویلي،چې دا عمليات یې د خلکو په غوښتنه پيل کړي دي.
په ورته مهال په ټولنیزو رسنیو کې د دغو عملياتو په اړه یو شمېر خلکو قهرجن غبرګونونه ښودلي او ویلي،چې طالبان په دې عملیاتو کې د خلکو سپکاوی او اذیت کوي،چې دا کار به ښې پايلې ورته ونه لري.
د منتقدانو په وینا، د هلمند د بست کلا سیمه کې د یکشنبې ورځې د عملياتو پر مهال د اڅکزيو د یوه قومي مشر د کورنۍ د ښځينه وو په ګډون د څو تنو مرګ ژوبله، په عملياتو کې قومي او عقده يي چلند، د ښځینه پرسونل نه موجوديت او د خلکو د دود او دستور په پام کې نه نیول به خلک د طالبانو خلاف را پاڅوي.
د کندهار د اطلاعاتو او فرهنګ ریاست لپاره د طالبانو چارواکو بيا د دغه ریاست په ټویټر پاڼه کې دا ادعاوې رد کړي دي.
سرچینې لیکلي:« د امنيتي ځواکونو سره په دې عملياتو کې ښځينه پوليسې هم شته، پر ټولو اسلامي او افغاني اصولو برابر تصفیوي عملیات دوام لري.د ګډو امنيتي ځواکونو سره په دې عملياتو کي د کلي مشران، ملا امامان او سپين ږيري هم همکاره دي.»
دا په داسې حال کې ده،چې د طالبانو چارواکو په هلمند کې د یکشنبې ورځې د پېښې په اړه رسنیو ته څه نه دي ويلي او نه ېې د يادې پېښې د عاملینو په اړه د کوم اقدام خبر ورکړل شوی.