تاند:(جمعه،د سنبلې پینځه ويشتمه) د ازبکستان په کوربه توب د سیمه ییزو همکاریو سازمان نن د خپلې کلنۍ غونډې په ګډه اعلاميه له طالبانو وغوښتل چې په افغانستان کې د ټولو قومي، مذهبي او سياسي لوریو په ګډون ټولګډونه حکومت جوړ کړي.
ياده اعلاميه د چین، روسیې، قزاقستان، قرغیزستان، تاجیکستان، ازبکستان او هندوستان د مشرانو له لوري تصويب شوې ده.
په اعلامیه کې د يادو هېوادونو په استازيتوب د شانګهای د سیمه ییزو همکاریو سازمان ټینګار کړی، چې د افغانستان د وضعیت ښه مدیریت د سازمان د غړو هېوادونو د امنيت په ټينګښت کې مهم رول لري.
په کابل کې د طالبانو حاکمه اداره،چې ځان ټول شموله او د ټولو افغانانو استازې ګڼي، د شانګهای سازمان د دغه پریکړه لیک په اړه غبرګون نه دی ښودلی.