تاند:( جمعه،د سنبلې پینځه ويشتمه) د طالبانو ادارې د هلمند په مرکزي زندان کې د ۶۰ روږدو کسانو د درملنې او له بنده د خوشې کیدو خبر ورکړی.
د طالبانو د دغه زندان یوه مسؤل قوماندان ملا محمد احمد وویل چې یاد کسان له درملنې او د هغوی د کورنیو له تضمین وروسته خوشې شول.
نوموړي زیاته کړه چې روغتیا پالانو د خوشې شویو کسانو درملنه وخت په وخت په منظمه توګه کړې ده.
د طالبانو تر کنټرول لاندې باختر خبري اژانس د معالجه شویو معتادينو له خولې دوی ته د طالبانو د ادارې پاملرنه ستایلې ده.
دا په داسې حال کې ده،چې مخکې له مختلفو سيمو څخه د نیشه یي معتادينو پر وړاندې د طالبانو د زور زياتي او ناوړه چلند راپورونه ورکړل شوي.