تاند(سې شنبه، د سنبلې ۲۲مه) نن ماښام به د بریتانیا د ملکې تابوت په هغه الوتکه کې لندن ته یووړل شي چې د تېر کال په اګست کې یې د طالبانو له واک ته رسیدو وروسته له افغانستانه زرګونه افغانان وایستل.
د ملکې الیزابیت مړی به له ادنبرا څخه د سلطنتي هوايي ځواک په سي – ۱۷ ګلوبماسټر الوتکه کې لندن ته راوړل شي او د راتلونکې اوونۍ د دوشنبې په ورځ (د سپټمبر ۱۹ مه) خاورو ته وسپارل شي.
ګلوبماسټر الوتکه د اوږدو سفرونو لپاره جوړه شوې او له هغې څخه په جګړه، سوله ساتو ماموریتونو او د بشري مرستو په رسولو کې کار اخیستل کېږي.
دا الوتکه د چینوک څرخکو، پوځي وسایطو او نورې درنې وسلې څه باندې ۸ زره کیلومتره او په څه باندې ۳۵ زره فوټه ارتفاع کې وړي. په مجموع کې ګلوبماسټر الوتکه ۴۵ زره کیلو وزن وړلی شي.
د ۲۰۲۱ د اګست له ۱۵ وروسته په دې الوتکه کې شاوخوا ۱۵ زره تنه له کابل څخه وایستل شول. همداراز په دې الوتکه کې د روسیې د یرغل خلاف اوکراین ته بشري مرستې او وسلې وړل شوي دي.