تاند:( سې شنبه،د سنبلې دوه ويشتمه) په افغانستان کې د طالبانو حاکمه اداره وايي،چې د پنجشیر په رخه، دره او افشار ولسوالیوکې ېې د خپلو وسله والو مخالفانو په ضد پراخ تصفوي عملیات ترسره کړي.
د طالبانو د ادارې عمومي ویاند ذبیح الله مجاهد وايي: په دې عملياتو کې د ۳ قومندانانو (فهیم کماندو، جواد او محمدیار) په ګډون ۴۰ تنه وژل شوي، د قومندان ملک خان په شمول ۱۰۱ تنه ژوندي نیول شوي، وسلې يې هم تر لاسه شوي دي.
نوموړي ويلي،چې په عملياتو کې وژل شویو او نیول شویو کسانو غوښتل د خلکو امنیت خراب کړي.
طالب وياند نه دي ویلي،چې وژل شوي او نیول شوي کسان د دوی د کومې وسله والې ډلې اړوند دي.
په پنجشېر کې تر ډېره د احمد مسعود په مشرۍ د طالبانو خلاف د وسله والې جګړې راپورونه ورکړل شوي.
د يادې ډلې په ګډون د طالبانو نورو وسله والو مخالفانو د دغو ادعا شویو عملیاتو او جزیاتو په اړه ېې څه نه دي ويلي.