تاند:(دوشنبه، د سنبلې يوويشتمه) د ترکېې د کډوالو وزارت چارواکو ويلي،چې د روانې سپټمبر میاشتې له دویمې تر اتمې نېټې ېې څه باندې ۳زره کډوال له خپلې خاورې ايستي چې نېږدې نیمايي یې افغانان دي.
ترکي چارواکو د دغو کډوالو د هویت په اړه څه نه دي ويلي،خو ځینې راپورونه ښيي چې په ويستل شويو کډوالو کې یوه لویه برخه ېې د جمهوري نظام امنيتي او دفاعي منسوبین دي.
هېواد ته د دوی د ستنیدو په اړه انديښنه ده،چې طالبان ېې ښايي ووژني يا ناوړه چلند ورسره وکړي.
مخکې په دې اړه ځینې راپورونه خپاره شوي، خو طالبانو رد کړي دي.
د ترکیې په استانبول کې د افغانستان مخکيني جنرال قونسل ذبیح الله حسین خېل چې تازه یې دنده پریښې، ویلي چې د دندې پرېښودو يو اصلي دليل ېې طالبانو سره د نوموړي نه يو ځای کیدل و.
د هغه په خبره، ده ترکېې ته ورغلو پخوانيو امنیتي منسوبینو سره ښه چلند کاوه، خو طالبانو د ترکیې حکومت نه غوښتي وو،چې يا دی له دندې ځواب او یا ددوی تابع کړي.
د ترکیې حکومت او طالبانو په دې اړه څه نه دي ويلي.
په وروستيو کې له ایران او پاکستان څخه هم افغان کډوالو سره د ناوړه چلند راپورونه ورکړل شوي.
د طالبانو له واکمنيدو وروسته، که څه هم دوی ادعا کوي،چې هیچا ته ګواښ نه دی رامنځته شوی، خو مختلفو هېوادونو ته په قانوني او غير قانوني لارو د ميليونونه افغانانو د کډوالۍ خبر ورکړل شوی.
شديد فقر، لوږه، بې کاري او د طالبانو له لوري امنيتي ګواښونه د کډوالۍ د دغې پراخې څپې اصلي لاملونه ګڼل شوي.